1918 წლის 18 სექტემბერს ჩატარდა საქართველოს ეროვნული საბჭოს საკონსტიტუციო კომისიის სხდომა. დაესწრნენ: პ. საყვარელიძე, რ. არსენიძე, კ. მაყაშვილი. დამხმარე: საბჭოს წევრი დ. ჩიქოვანი თავმჯდომარეობდა კ. მაყაშვილი მდივნობდა დ. ნახუცრიშვილი ეროვნული საბჭოს სახელწოდების შეცვლის შესახებ მოახსენება წაიკითხა პ. საყვარელიძემ; იგი ამბობს, რომ საბჭოს სახელწოდების პარლამენტად შეცვლა შეუძლებელია, რადგანაც პარლამენტი საზოგადო სახელწოდებაა საკანონმდებლო დაწესებულებათა, წინააღმდეგ ამისა, ყოველს სახელმწიფოში პარლამენტს საკუთრი ისტორიულად შემუშავებული სახელი აქვს. ჩვენ უნდა ავირჩიოთ ისევ ქართულ სახელწოდებაში რომელიმე; ასეთია სახელწოდებანი: კრება, საკრებულო, დარბაზი, საბჭო და სხვ. ისტორიულად მეცნიერთა მოწმობით ხმარებაში იყო სიტყვა დარბაზი; მაგრამ უმჯობესად მომხსენებელს მიაჩნია დარჩეს ისევ საბჭო ეროვნულის შეცვლით. შეიძლება ეწოდოს აგრეთვე წარმომადგენელთა პალატა, წარმომადგენელთა საბჭო. რ. არსენიძე იცავს იმ აზრს, რომ ეროვნულ საბჭოს ეწოდოს ხალხის წარმომადგენელთა დარბაზი.

წყარო: საქართველოს დემოკრატიული რესპუბლიკის დამფუძნებელი კრება | 1919-1921
წყაროს ტიპი: საარქივო დოკუმენტი
გამოცემის ადგილი: თბილისი, საქართველო
ენა:ქართული
დაცულია: საქართველოს იუსტიციის სამინისტროს სსიპ საქართველოს ეროვნული არქივი